مجلة مسار ادبي

الفقرة السادسة :الاسكريبت الكوميدى الأجتماعى

بقلم|سها طاهر

عن الغلاء المستمر لاسعار الادوية

في الصيدلية

الشاب : لو سمحت عايز المضاد الحيوي ده .

الصيدلانية : اتفضل ، تمنه 60 جنية.

الشاب : ليه انا شاريه من 4 ايام ب50 بعد ماغلي ، هو أيه دهب ؟! كل يوم بسعر ، ده حتى العلبة عليها 50 اهي.

الصيدلانية : العلبة ؟! يااااه ، سوري بجد ، الغلط مني أنا ، طيب هاتها ثواني كده.

الشاب : اتفضلي ، شفتي أهي عليها 50 ذي ماقلت اهي ، متتعبيش نفسك بتكتبي ايه منا عارف الجرعة .

الصيدلانية : لا جرعة ايه؟ انا بعدلك السعر ، علشان يبقى مكتوب ، اتفضل اهو مكتوب عليه 60 اهو ملكش حجة بقى .

جرس الموبايل..ايوة يا سعيد ، ماشي ، كويس انك قلتلي....

الشاب : أمري لله ، اتفضلي آدي ال60 اهم.

الصيدلانية : لا ثواني ثواني ، هات العلبة تاني كده معلش .

الشاب : كنت عارف ان فيه غلط والله ، اتفضلي أهي .

الصيدلانية : اه الحمد لله ، كان هيحصل غلط لكن لحقناه ، اتفضل ياسيدي العلبة.

الشاب : اتفضلي ال50.

الصيدلانية : لا 50 ايه و 60 ايه ، ناقص كمان عشرين جنيه .

الشاب : بتوع ايه بقى؟!

الصيدلانية : باقي ثمن المضاد الحيوي ، المورد لسه مبلغني قدامك اهو ان النوع ده بالذات زاد 33٪

الشاب : لا والله ، يعني بقى كام ؟

الصيدلانية : 79جنية و 80 قرش .

الشاب : يا سلام ! ماتقولي 80 وخلاص .

الصيدلانية : لا مستحيل طبعا ، إزاي ناخد أكتر من حقنا ؟! اتفضل المضاد الحيوي أهو و معاه برشامة صداع ، مع إن تمنها 25 قرش لكن ياللا خلليها علينا المرة دي.

الشاب : برشامة صداع بحالها ، ياااااه مش عارف اشكرك ازاي ! اقولك اتفضلي الفلوس خلليني ألحق آخد الدواء بسرعة .

الصيدلانية : بالراحة فيه ايه بس ؟! حضرتك متسربع ليه ؟!

الشاب : الحق أخده بسرعة المرة دي قبل ما يغلى ، عندي إحساس ان جايلك تليفون تاني دلوقتي.